Për dy ditë me radhë, në Shkodër u zhvillua censusi dimëror i shpendëve ujorë në liqenin e Shkodrës, lumin Buna dhe liqenin e Vaut të Dejës.

Monitorimi u krye nga Agjencia e Zonave të Mbrojtura Shkodër, në bashkëpunim me ekspertë të fushës, të organizuar në tre grupe pune në terren.

Sipas rezultateve paraprake, është konstatuar një rritje e numrit të shpendëve emigratorë në liqenin e Shkodrës.

Tonin Macaj, përgjegjës i sektorit të menaxhimit ADZM, thekson se kjo rritje lidhet edhe me temperaturat më të ulëta që kanë karakterizuar këtë vit, duke ndikuar në shtimin e pranisë së shpendëve shtegtarë në këtë zonë.

Ky është viti i 10-të që zhvillohet censusi dimëror i shpendëve, të cilët gjatë kësaj periudhe shtegtojnë nga Europa Veriore drejt vendit tonë, për të gjetur kushte më të përshtatshme për qëndrim./euronews.al